Sunday Special by Article by Hitesh Jagad.
કેનેડામાં ડાઇનિંગ (જમવા જવું) ની આદતો ધરમૂળથી બદલાઈ રહી છે. કેનેડિયન ગ્રાહકો હવે ઓછું બહાર ખાય છે, લિકર નો વપરાશ ઘટ્યો છે, અને ખર્ચવામાં આવતા દરેક ડોલર માટે વધુ મૂલ્ય (value) ની માંગ કરી રહ્યા છે. આ પરિવર્તન દેશના ફૂડસર્વિસ ઉદ્યોગને નવો આકાર આપી રહ્યું છે.
રેસ્ટોરન્ટ્સ કેનેડાના લેટેસ્ટ ‘2025 ફૂડસર્વિસ ફેક્ટ્સ’ રિપોર્ટનો સંદેશ સ્પષ્ટ છે: વધતી મોંઘવારીની કટોકટી (affordability crisis) ગ્રાહકો અને રેસ્ટોરન્ટ્સ બંનેને સખત અસર કરી રહી છે, જેના કારણે જમવાની મૂળભૂત આદતોમાં ફેરફાર થઈ રહ્યા છે.
મોંઘવારીના કારણે, ચારમાંથી ત્રણ (75 ટકા) કેનેડિયનોએ બહાર જમવા કે ઓર્ડર કરવા પર કાપ મૂક્યો છે. 18 થી 34 વર્ષની વયના યુવાનોમાં આ આંકડો 81 ટકા જેટલો ઊંચો છે. આ ઉપરાંત, ‘વર્ક ફ્રોમ હોમ’ (WFH) સંસ્કૃતિની વ્યાપકતાએ પણ રેસ્ટોરન્ટ્સના બિઝનેસ મોડેલને અસર કરી છે. જે ઉદ્યોગ ગ્રાહકોની નિયમિત અવરજવર પર ચાલે છે, તેના માટે આ એક ચિંતાજનક સંકેત છે. કારણ કે લોકો ઓફિસ કે કામકાજના સ્થળોથી દૂર રહે છે, તેથી લંચ માટે બહાર જવાનું અથવા સાથીદારો સાથે ડાઇનિંગનું ચલણ ઘટ્યું છે. રિપોર્ટ ચેતવણી આપે છે કે ભલે કેનેડિયનોને હજુ પણ બહાર ખાવું ગમે છે, પરંતુ તેઓ મોંઘવારી અને જીવનશૈલીના ફેરફારોને કારણે ક્યારે, કેવી રીતે અને શા માટે ખર્ચ કરવો તે અંગે પહેલા કરતાં વધુ સાવધ છે.
રેસ્ટોરન્ટ્સ બે મોરચે ફસાયેલા છે. એક તરફ, આંતરિક પ્રવાસનને કારણે વેચાણમાં થોડો વધારો જરૂર થયો છે, જેનાથી થોડી નુકસાનની ભરપાઈ થઇ રહી છે. પરંતુ બીજી તરફ, વધતા ખાદ્યપદાર્થોના ભાવ, લેબર અવરલી પગારધોરણ અને પ્રતિ-વ્યક્તિ વધી રહેલા ખર્ચના કારણે માર્જિન (નફો) ખૂબ જ પાતળું થઈ ગયું છે. રેસ્ટોરન્ટ્સ કેનેડાના પ્રમુખ અને સીઇઓ, કેલી હિગિન્સન કહે છે, “ભલે છેલ્લા એક વર્ષમાં સ્થિતિમાં થોડો સુધારો થયો હોય, પરંતુ આ હજુ પણ ખૂબ જ પડકારજનક બજાર છે, કારણ કે કેનેડિયનો મોંઘવારીનો સામનો કરી રહ્યા છે અને વધતા ઓપરેશનલ ખર્ચ ઓપરેટરોના માર્જિનને સંકોચાય રહ્યા છે.
“આંકડા પરિસ્થિતિ સ્પષ્ટ કરે છે. કેનેડિયનો હવે ફુલ-સર્વિસ રેસ્ટોરન્ટ્સમાં વાર્ષિક સરેરાશ $1,035 ખર્ચે છે, જે 2019 માં $1,165 (-$130) હતો. ક્વિક-સર્વિસ રેસ્ટોરન્ટ્સમાં વાર્ષિક ખર્ચ $1,135 થયો છે, જે છ વર્ષ પહેલાં $1,150 હતો. આ ઘટાડો કાગળ પર સામાન્ય લાગે, પરંતુ લાખો ગ્રાહકોમાં તે ઉદ્યોગ માટે અબજો ડોલરના વેચાણનું નુકસાન છે.
સ્નેકિંગ (નાસ્તા) નું રાજ, લિકર નો ઓછો વપરાશ સૌથી મોટો બદલાવ કેનેડિયનો શું ખાઈ રહ્યા છે તેમાં આવ્યો છે. ખર્ચ, સગવડ અને પેઢીગત પસંદગીને કારણે હવે વધુ લોકો પરંપરાગત ભોજનની જગ્યાએ નાસ્તાને અપનાવી રહ્યા છે.
- 65 ટકા કેનેડિયનો સ્વીકારે છે કે તેઓ મહિનામાં ઓછામાં ઓછું એકવાર ભોજનને બદલે નાસ્તો કરે છે. મિલેનિયલ્સ અને જનરેશન ઝેડ પેઢીના અડધાથી વધુ લોકો તો સાપ્તાહિક ધોરણે આવું કરે છે.
- એક આશ્ચર્યજનક વલણ એ છે કે લિકરનો વપરાશ ઘટી રહ્યો છે. 41 ટકા કેનેડિયનોએ જણાવ્યું કે તેઓ એક વર્ષ પહેલાં કરતાં ઓછો દારૂ પી રહ્યા છે. બૂમર્સ (46 ટકા) અને જનરેશન એક્સ (45 ટકા) આ કપાતમાં મોખરે છે.
- આ ઘટાડાના મુખ્ય કારણોમાં 71 ટકા લોકો આરોગ્યની ચિંતા, 50 ટકા જીવનશૈલીમાં ફેરફાર અને 34 ટકા લોકો પૈસા બચાવવાનો પ્રયાસ કરવાનું જણાવે છે.
- કોફી હજી પણ ટોચનું પીણું છે, પરંતુ તેનો વપરાશ 1.4 ટકા ઘટ્યો છે, જ્યારે ફ્રૂટ જ્યુસ 1.5 ટકા અને આઇસ્ડ ટી 0.5 ટકા વધ્યા છે.
બદલાવ વચ્ચે પણ થોડા તેજસ્વી સંકેતો છે. યુવાન પેઢી બજારને જીવંત રાખી રહી છે.
- 51 ટકા મિલેનિયલ્સ અને 47 ટકા જનરેશન ઝેડ કહે છે કે તેઓ અઠવાડિયામાં ઓછામાં ઓછું એકવાર રેસ્ટોરન્ટમાંથી ખરીદી કરે છે.
- લોકો પાછા ઓફિસોમાં ફરતાં, ક્વિક-સર્વિસ રેસ્ટોરન્ટ્સમાં બપોરના ભોજનના ટ્રાફિકમાં 7.6 ટકાનો ઉછાળો આવ્યો છે, જે કોવિડ પહેલાના સ્તરને વટાવી ગયો છે.
- જીવનશૈલીમાં બદલાવના સંકેત તરીકે, ઓપનટેબલ અનુસાર, છેલ્લા એક વર્ષમાં એકલા જમવા માટેના (Solo Dining) રિઝર્વેશનમાં 28 ટકાનો જંગી વધારો થયો છે.
ગ્રાહકો દરેક ડોલર પર નજર રાખી રહ્યા હોવાથી, રેસ્ટોરન્ટ્સ માટે મોટો પડકાર એ છે કે તેઓ કેવી રીતે મૂલ્ય (value) આપી શકે.
રિપોર્ટના સંશોધન વિશ્લેષક, સારા હમદી કહે છે, “મોંઘવારીની ચિંતાઓ હાલમાં દરેકને, ખાસ કરીને યુવાન પેઢીઓને અસર કરી રહી છે. કેનેડિયનો હજી પણ બહાર જમવા કે ઓર્ડર કરવા માગે છે, પરંતુ જ્યારે તેઓ આવું કરે છે, ત્યારે તેઓ તેમના પૈસા માટે વધુ મૂલ્ય શોધી રહ્યા છે.”
‘મૂલ્ય’ નો અર્થ હંમેશા સસ્તી કિંમત જ નથી હોતો. કેટલાક માટે, તેનો અર્થ હેલ્થી મેનુ વિકલ્પો, ઓછા ખર્ચે નાના પોર્શન અથવા બંડલ ડીલ્સ છે જે ડોલરને વધુ ખેંચે.
સ્નેકિંગનું વલણ, સોલો ડાઇનિંગનો ઉદય, અને લિકરના ખર્ચમાં ઘટાડો – આ બધું એક જ વાસ્તવિકતા તરફ નિર્દેશ કરે છે: કેનેડિયનો ઈચ્છે છે કે બહાર જમવું વ્યવહારુ, પોસાય તેવું અને ‘વર્થ–ઇટ’ લાગે.
જે ઓપરેટરો આ નવી આદતો સાથે અનુકૂલન સાધી શકશે — પછી ભલે તે પોસાય તેવા લંચ મેનુ, આરોગ્યપ્રદ પીણાં કે સ્નેક-સાઇઝના પોર્શન ઓફર કરીને હોય — તેઓ આ પડકારજનક સમયમાં ટકી રહેવાની વધુ સારી તક ધરાવે છે.
બહાર જમવાનું સપનું સમાપ્ત થયું નથી, પરંતુ તે બદલાઈ ગયું છે. કેનેડિયનો ભલે ખર્ચમાં કાપ મૂકી રહ્યા હોય, પરંતુ તેઓ રેસ્ટોરન્ટ્સને સંપૂર્ણપણે છોડી રહ્યા નથી. તેઓ હજી પણ બહાર ખાવાના અનુભવ, ડિલિવરીની સગવડ અને ખોરાકના સામાજિક પાસાને માણે છે. જોકે, તેઓ હવે બિનજરૂરી ખર્ચ સ્વીકારવા તૈયાર નથી. જે રેસ્ટોરન્ટ્સ આ વાતને સમજે છે અને તેનું સન્માન કરે છે, તે જ આ નવા અર્થતંત્રમાં તેમના દરવાજા ખુલ્લા રાખી શકશે.
