બ્રેમ્પટન મેયર ચૂંટણીમાં ઐતિહાસિક મોડ: ૧૬ પ્રમુખ ગુજરાતી સંસ્થાઓ અને અગ્રણી નેતાઓનો પેટ્રિક બ્રાઉનને ખુલ્લો ટેકો
ધ્વનિ ન્યૂઝ ઓનલાઇન | બ્રેમ્પટન
ઓન્ટેરિયો પ્રોવિન્સના અતિ મહત્વના ગણાતા બ્રેમ્પટન શહેરમાં આગામી ૨૬ ઓક્ટોબરે યોજાનારી મ્યુનિસિપલ ઇલેક્શન પૂર્વે સ્થાનિક રાજકારણમાં એક અભૂતપૂર્વ અને ગરમાવો લાવનારો રાજકીય ઘટનાક્રમ સામે આવ્યો છે. બ્રેમ્પટનના સામાજિક, સાંસ્કૃતિક અને ધાર્મિક તાણાવાણા સાથે જોડાયેલા ગુજરાતી સમુદાયના ૧૬ જેટલા અગ્રણી સંગઠનો અને તેમના જવાબદાર પદાધિકારીઓએ એકસૂરે વર્તમાન મેયર પેટ્રિક બ્રાઉનની રી-ઇલેક્શનને ખુલ્લો અને મજબૂત ટેકો જાહેર કર્યો છે. ઓક્ટોબર ૨૧ના રોજ પેટ્રિક બ્રાઉનની રી-ઇલેક્શન કેમ્પેઇન સમિતિ દ્વારા જાહેર કરવામાં આવેલી અધિકૃત પ્રેસ રિલીઝ અનુસાર, બ્રેમ્પટન શહેરના હજારો ગુજરાતી દક્ષિણ એશિયાઈ નિવાસીઓનું પ્રતિનિધિત્વ કરતા આ અગ્રણીઓએ એક સંયુક્ત નિવેદન બહાર પાડીને મેયર બ્રાઉનના ચાર વર્ષના કાર્યકાળ, વિકાસલક્ષી નીતિઓ, આર્થિક રોકાણ, હેલ્થકેર ક્ષેત્રે ક્રાંતિ, ટ્રાન્ઝિટ, પબ્લિક સેફ્ટી અને સાંસ્કૃતિક પ્રોત્સાહનને બિરદાવ્યા છે.
આ સંયુક્ત સપોર્ટ લેટરમાં સાઇન કરનારાઓમાં બ્રેમ્પટનની જાણીતી સંસ્થાઓ અને અગ્રણીઓએ ભારપૂર્વક જણાવ્યું છે કે ઝડપથી વધી રહેલા બ્રેમ્પટન શહેરને યોગ્ય દિશા આપવા અને ઇન્ફ્રાસ્ટ્રક્ચરનો વિકાસ ચાલુ રાખવા માટે પેટ્રિક બ્રાઉનની આગેવાની અત્યંત આવશ્યક છે.
| પ્રમુખ/નેતાનું નામ (Name) | સંસ્થા/સંગઠનનું નામ (Organization) |
|---|---|
| જીગર પ્રજાપતિ (Director) | શ્રી હરિ સેવા ટ્રસ્ટ (Shree Hari Seva Trust) |
| શિલ્પેશ પરીખ (President) | દેશી રોયલ્સ કોમ્યુનિટી સર્વિસિસ (Desi Royals Community Services) |
| પ્રમેશ નંદી (Executive Director) | સ્વર ગુંજન મ્યુઝિક એકેડેમી (Swar Gunjan Music Academy) |
| અમીષ ભટ્ટ (President) | ડાયવર્સિટી કલ્ચરલ એસોસિએશન (Diversity Cultural Association) |
| અખિલ શાહ (President) | ફ્રેન્ડ્સ ઓફ ગુજરાત (Friends of Gujarat) |
| સુગ્નેશ પટેલ (President) | આઇ લવ ગુજરાત ગ્રુપ (I Love Gujarat Group) |
| ઉદય ચૌધરી (Vice President) | ગરવી ગુજરાત સીનિયર ગ્રુપ (Garvi Gujarat Senior Group) |
| ભૌમિક મોદી (President) | મોઢ ગાંધી સમાજ ઓફ ઓન્ટેરિયો કેનેડા (MGSOC) |
| દક્ષ રાજા (President) | ગુજરાતી સીનિયર્સ ગ્રુપ ઓફ બ્રેમ્પટન (Gujarati Seniors Group of Brampton) |
| જય ભાવસાર (President) | સ્વર સાધના મ્યુઝિક લવર્સ ક્લબ (Swar Sadhana Music Lovers Club) |
| ધવલ કુમાર સોની (President) | વડતાલ ધામ હિન્દુ કલ્ચરલ સેન્ટર (Vadtal Dham Hindu Cultural Center) |
| અમિત ભટ્ટ (President) | સાઉથલેક સીનિયર્સ ક્લબ કેનેડા ફાઉન્ડેશન (Southlake Seniors Club Canada Foundation) |
| રણજીત ભાઈ પટેલ (President) | મેફીલ્ડ વિલેજ સીનિયર્સ ગ્રુપ (Mayfield Village Seniors Group) |
| એચ. બી. શાહ (Secretary) | શ્રીમદ્ ભગવદ્ ગીતા પાર્ક કલ્ચરલ ગ્રુપ (Shrimad Gita Park Cultural Group) |
| ભાવિની પટેલ (Director) | મેફીલ્ડ વિલેજ ગરબા મહોત્સવ ગ્રુપ (Mayfield Village Garba Mahotsav Group) |
| મિહિર ઓઝા (Owner) | S.O.N.U. Celebrations) |
આ આર્થિક અને સામાજિક સમર્થન પાછળ બ્રેમ્પટનમાં થયેલા મોટા ઇન્વેસ્ટમેન્ટ્સ મુખ્ય કારણ દર્શાવાયા છે. બ્રાઉન નિયામક કાળ ગ્લોબલ અને અગ્રણી કંપનીઓ બ્રેમ્પટન તરફ આકર્ષાઈ છે, જેનાથી સ્થાનિક કક્ષાએ હજારો નવી જોબ્સ અને ઇકોનોમિક તકોનું સર્જન થયું છે. હેલ્થકેર ક્ષેત્રે વાત કરીએ તો, બ્રેમ્પટનના બીજા અદ્યતન હોસ્પિટલ પ્રોજેક્ટને ઝડપી મંજૂરી, નવું ઇમરજન્સી ડિપાર્ટમેન્ટ અને ઇન-પેશન્ટ કેર સેવાઓનો વિસ્તાર મેયર બ્રાઉનની મોટી સફળતા ગણાવાઈ રહી છે. આ ઉપરાંત, શિક્ષણ જગતમાં ચર્ચાસ્પદ બનેલી ટોરોન્ટો મેટ્રોપોલિટન યુનિવર્સિટી (TMU) ની નવી મેડિકલ સ્કૂલ બ્રેમ્પટનમાં આવી રહી છે. નોંધનીય છે કે, TMU ની આ મેડિકલ સ્કૂલ ઓન્ટેરિયો પ્રોવિન્સમાં છેલ્લા ૨૦ વર્ષમાં સ્થપાનારી પ્રથમ અને ગ્રેટર ટોરોન્ટો એરિયા (GTA) માં છેલ્લા ૧૦૦ કરતાં વધુ વર્ષોમાં સ્થપાનારી પ્રથમ મેડિકલ સ્કૂલ છે, જે શહેરના હેલ્થકેર અને એજ્યુકેશન ક્ષેત્રે ઐતિહાસિક સીમાચિહ્ન રૂપ સાબિત થશે.
ટ્રાન્સપોર્ટેશન ક્ષેત્રે, મેયર બ્રાઉને હેઝલ મૅકકેલિયન LRT લાઇનને ડાઉનટાઉન બ્રેમ્પટન સુધી લંબાવવા અને તેમાં ભૂગર્ભ ટનલ સેક્શન બનાવવાની મજબૂત રજૂઆત કરી છે, જેને ગુજરાતી સમુદાયે આવકારી છે. આ સાથે સાઉથવેસ્ટ બ્રેમ્પટનમાં ૧,૭૫,૦૦૦ ચોરસ ફૂટમાં આકાર લઈ રહેલા અદ્યતન ‘એમ્બલટન કોમ્યુનિટી સેન્ટર’ (Embleton Community Centre) માટે ફાળવવામાં આવેલી ૬૪ મિલિયન ડૉલરની ફેડરલ ગ્રાન્ટનો પણ ઉલ્લેખ કરાયો છે. આ કોમ્યુનિટી સેન્ટરમાં મોર્ડન સ્વિમિંગ પૂલ, ફિટનેસ ફેસિલિટીઝ, ચાઇલ્ડકેર અને સામાજિક કાર્યક્રમો માટે વિશાળ કોમ્યુનિટી સ્પેસ ઉપલબ્ધ બનશે. પબ્લિક સેફ્ટી માટે નવા ૨૩ ડિવિઝન પોલીસ ફેસિલિટીની સ્થાપના અને ઈન્ડો-કેનેડિયન સમુદાયની સાંસ્કૃતિક ઓળખ જેવા કે નવરાત્રી મહોત્સવ, ઇન્ટરનેશનલ ડે ઓફ યોગા, ગ્રીનબ્રાયર પાર્ક સાઉથ ખાતે યોજાતો ‘બ્રેમ્પટન કાઈટફેસ્ટ’ તેમજ ક્રિકેટ ફેસિલિટીઝના વિસ્તરણ માટે બ્રાઉને આપેલા સતત સહયોગને અગ્રણીઓએ બિરદાવ્યો છે.
‘ધ્વનિ’ એ ભૂતકાળમાં પણ સ્થાનિક મ્યુનિસિપલ લોકશાહીમાં ગુજરાતી સામાજિક અને વ્યાપારિક નેતાઓની સક્રિય ભાગીદારીની જરૂરિયાત પર ભાર મૂક્યો હતો. આ સંદર્ભમાં ૧૬ સંસ્થાઓનું આ સંયુક્ત એન્ડોર્સમેન્ટ લોકશાહી પ્રક્રિયામાં સમુદાયના ઉત્સાહજનક સશક્તિકરણનું એક ઉત્તમ ઉદાહરણ પૂરું પાડે છે. જોકે, કેમ્પેઇન દ્વારા જાહેર કરાયેલ આ યાદીમાં સંસ્થાઓના આંતરિક વોટિંગ કે સભ્યોની વ્યક્તિગત રાજકીય પસંદગીની પ્રક્રિયા સ્પષ્ટ કરવામાં આવી નથી. તેમ છતાં, જીટીએ (GTA) અને આસપાસના વિસ્તારોમાં પણ અન્ય અગ્રણીઓ દ્વારા આવા જાહેર સમર્થનનો પ્રવાહ શરૂ થાય તો નવાઈ નહીં. જાહેર સમર્થનની આવી જાહેરાતો મતદારોને કેન્ડિડેટ્સના રેકોર્ડ્સ ચકાસવાની, ઉમેદવારોના કમિટમેન્ટ્સ સરખાવવાની અને પોતાના નેબરહૂડ તથા પરિવારના ભવિષ્ય માટે યોગ્ય નિર્ણય લેવાની ઉત્તમ તક પૂરી પાડે છે. આગામી સોમવારે ૨૬ ઓક્ટોબરે જ્યારે બ્રેમ્પટન વોટિંગ કરવા જશે, ત્યારે દરેક નાગરિકનો વ્યક્તિગત અને પવિત્ર મત જ આખરી નિર્ણય કરશે.
