પાયલોટ અને ફ્લાઇટ એટેન્ડન્ટનો વેશધારણ કરી સેંકડો ફ્રી ફ્લાઇટ્સ લેનાર કેનેડિયન શખ્સ સામે છેતરપિંડી નો ગુનો દાખલ
Dhwani Reports :
અમેરિકામાં વર્ષો સુધી એરલાઇન ક્રૂ મેમ્બર હોવાનો દાવો કરી ઉત્તર અમેરિકામાં સેંકડો ફ્રી ફ્લાઇટ્સ મેળવનાર ટોરોન્ટોના એક શખ્સ સામે છેતરપિંડીના ગંભીર આરોપો હેઠળ કાર્યવાહી હાથ ધરવામાં આવી છે. યુએસ ફેડરલ પ્રોસિક્યુટર્સના જણાવ્યા અનુસાર, ૩૩ વર્ષીય ડલ્લાસ પોકોર્નિકે વ્યાપારી પાયલોટ અને સક્રિય ફ્લાઇટ એટેન્ડન્ટ તરીકેનો ઢોંગ રચી અનેક અમેરિકન એરલાઇન્સમાં કર્મચારીઓ માટેની ખાસ મુસાફરી સુવિધાઓનો ગેરકાયદેસર લાભ લીધો હતો. પોકોર્નિકની પનામામાં ધરપકડ કરવામાં આવી હતી અને તેને યુનાઇટેડ સ્ટેટ્સમાં પ્રત્યાર્પણ કરવામાં આવ્યું હતું. આ અઠવાડિયે હવાઈની ફેડરલ કોર્ટમાં રજૂ કરવામાં આવતા તેણે વાયર ફ્રોડના આરોપો સામે પોતે નિર્દોષ હોવાનું જણાવ્યું હતું.
અદાલતી દસ્તાવેજો મુજબ, પોકોર્નિકે અગાઉ ૨૦૧૭ થી ૨૦૧૯ દરમિયાન ટોરોન્ટો સ્થિત એરલાઇનમાં ફ્લાઇટ એટેન્ડન્ટ તરીકે કામ કર્યું હતું. તે નોકરી છોડ્યા પછી, પ્રોસિક્યુટર્સનું કહેવું છે કે તેણે તે એરલાઇનનું નકલી અથવા ગેરકાયદેસર રીતે મેળવેલ આઈડી કાર્ડ વાપરી અન્ય ત્રણ એરલાઇન્સમાં પાયલોટ અને ફ્લાઇટ એટેન્ડન્ટ્સ માટે આરક્ષિત ફ્લાઇટ્સ બુક કરાવી હતી. તપાસકર્તાઓના જણાવ્યા મુજબ, આ કૌભાંડ માત્ર સ્ટેન્ડબાય ટ્રાવેલ પૂરતું મર્યાદિત નહોતું. પોકોર્નિકે કથિત રીતે કોકપિટમાં વધારાની સીટ, જેને ‘જમ્પ સીટ’ કહેવામાં આવે છે, તેના માટે પણ વિનંતી કરી હતી. જોકે તેને કોકપિટમાં પ્રવેશ મળ્યો હતો કે કેમ તે સ્પષ્ટ નથી, પરંતુ આ બાબતે સુરક્ષા અંગે ગંભીર ચિંતાઓ જન્માવી છે.
આ કેસમાં હોનોલુલુ, શિકાગો અને ફોર્ટ વર્થ સ્થિત એરલાઇન્સના નામ જોડાયેલા છે, જે સંભવતઃ હવાઇયન એરલાઇન્સ, યુનાઇટેડ એરલાઇન્સ અને અમેરિકન એરલાઇન્સ હોઈ શકે છે. ટોરોન્ટોની કઈ એરલાઇનનું આઈડી વપરાયું હતું તે હજુ જાહેર કરાયું નથી, પરંતુ એર કેનેડાએ સ્પષ્ટ કર્યું છે કે પોકોર્નિકે ક્યારેય તેમની કંપનીમાં કામ કર્યું નથી. આ છેતરપિંડી આશરે ચાર વર્ષ સુધી ચાલી હોવાનું માનવામાં આવે છે. નિષ્ણાતો આ કિસ્સાને હોલીવુડ ફિલ્મ ‘કેચ મી ઇફ યુ કેન’ સાથે સરખાવી રહ્યા છે, પરંતુ નોંધ્યું છે કે ૯/૧૧ પછીની કડક સુરક્ષા વચ્ચે આવી ઘટના અત્યંત ચિંતાજનક છે. જો તે દોષિત સાબિત થશે, તો તેને ફેડરલ કાયદા હેઠળ લાંબી જેલની સજા થઈ શકે છે.
