ટોરોન્ટો: વિશ્વના સૌથી મોટા રમત મહોત્સવ એટલે કે ફિફા વર્લ્ડ કપ 2026 માટે અત્યારથી જ ટોરોન્ટોમાં થનગનાટ જોવા મળી રહ્યો છે. સિટી ઓફ ટોરોન્ટોએ તાજેતરમાં ‘ફિફા ફેન ફેસ્ટિવલ ટોરોન્ટો’ની સત્તાવાર પ્રથમ ઝલક રજૂ કરી છે. આ ફેસ્ટિવલ શહેરના ઐતિહાસિક ફોર્ટ યોર્ક અને ધ બેન્ટવે વિસ્તારને એક વિશાળ ફૂટબોલ હબમાં ફેરવી દેશે. 11 જૂનથી 19 જુલાઈ, 2026 સુધી ચાલનારા આ 22 દિવસીય ઉત્સવમાં ફૂટબોલ ચાહકો માટે પ્રવેશ બિલકુલ મફત રાખવામાં આવ્યો છે, જે કેનેડામાં વસતા ફૂટબોલ પ્રેમીઓ માટે ખૂબ જ આનંદના સમાચાર છે. આ આયોજનનો હેતુ સ્થાનિક રહિશો અને વિશ્વભરમાંથી આવતા પ્રવાસીઓને એકસાથે લાવીને ફૂટબોલની રમતની અદભૂત ઉજવણી કરવાનો છે.
આ ફેન ફેસ્ટિવલમાં વર્લ્ડ કપની તમામ 46 મેચોનું લાઈવ પ્રસારણ વિશાળ સ્ક્રિન પર કરવામાં આવશે. આ માત્ર મેચ જોવાનું સ્થળ જ નહીં, પરંતુ એક મોટું સાંસ્કૃતિક કેન્દ્ર પણ બની રહેશે. કેનેડાના સુપ્રસિદ્ધ કલાકારો જેવા કે એલેસિયા કારા, ડેબોરાહ કોક્સ, કાર્ડિનલ ઓફિશલ, શોન ડેસમેન અને ધ સ્ટ્રમ્બેલાસ આ મંચ પર પોતાના પર્ફોર્મન્સ આપશે. આયોજકોના જણાવ્યા મુજબ, આ ફેસ્ટિવલ ટોરોન્ટોની બહુસાંસ્કૃતિક ઓળખને વિશ્વ સમક્ષ રજૂ કરશે. હિપ-હોપ લેજન્ડ કાર્ડિનલ ઓફિશલ દ્વારા ક્યુરેટ કરાયેલ ‘સાઉન્ડક્લેશ સોસાયટી’ આ ઉત્સવમાં સંગીતનો જાદુ વિખેરશે. આ ઉપરાંત મેક્સિકો, ઘાના, જાપાન, કોરિયા અને કેનેડાના સ્વદેશી (ઇન્ડીજીનસ) સમુદાયોની પરંપરાગત કલા અને સંસ્કૃતિના દર્શન પણ અહીં થશે.
રમતગમત અને મનોરંજનની સાથે સાથે અહીં ફૂડ પ્રેમીઓ માટે પણ ઘણું બધું હશે. આંતરરાષ્ટ્રીય સ્તરના ફૂડ વેન્ડર્સ ટોરોન્ટોની વૈવિધ્યસભર ખાણીપીણીની સંસ્કૃતિ પીરસશે. બાળકો અને પરિવારો માટે ખાસ પ્લે ઝોન અને ઇન્ટરેક્ટિવ ફેન એક્સપિરિયન્સ જેવી સુવિધાઓ ઉભી કરવામાં આવશે. સ્વદેશી કલાકારો દ્વારા તૈયાર કરવામાં આવેલી કસ્ટમ સોકર મિની-પિચ અને આર્ટ ઇન્સ્ટોલેશન્સ આ આકર્ષણમાં વધારો કરશે. ફેસ્ટિવલની ફ્રી ટિકિટો માટેનું રજીસ્ટ્રેશન 6 મેથી શરૂ થશે. ટોરોન્ટો આ વર્લ્ડ કપની કુલ 6 મહત્વની મેચોનું યજમાન પદ ભોગવી રહ્યું છે, જે કેનેડાના ઈતિહાસમાં એક માઈલસ્ટોન સમાન છે. આ આખા આયોજનથી ગ્રેટર ટોરોન્ટો એરિયામાં આશરે 940 મિલિયન ડોલરની આર્થિક પ્રવૃત્તિ થવાની ધારણા છે. આ ફેસ્ટિવલ ટોરોન્ટોને વિશ્વના નકશા પર એક સ્પોર્ટ્સ અને કલ્ચરલ કેપિટલ તરીકે સ્થાપિત કરશે.
