CBSA ની નવી ગાઇડલાઇન: નેક્સસ કન્ડીશનલ એપ્રૂવલ બાદ તાત્કાલિક ઇન્ટરવ્યુ બુક કરવા અપીલ
Dhwani News Online
નેક્સસ કાર્ડ મેળવવું હવે બનશે મુશ્કેલ? CBSA એ અચાનક બદલ્યા ઇન્ટરવ્યુના નિયમો!
કેનેડા અને યુનાઇટેડ સ્ટેટ્સ વચ્ચે ઝડપી અને સરળ મુસાફરીની સુવિધા આપતા લોકપ્રિય નેક્સસ (NEXUS) પ્રોગ્રામને લઈને કેનેડા બોર્ડર સર્વિસીસ એજન્સી (CBSA) દ્વારા એક અતિ મહત્વપૂર્ણ અને તાકીદની જાહેરાત કરવામાં આવી છે. કોરોના મહામારી દરમિયાન અરજદારોને ઇન્ટરવ્યુ બુક કરવા માટે આપવામાં આવેલી વિશેષ રાહત અને પાંચ વર્ષની લંબાવેલી મુદતનો અંત આગામી ફોલમાં આવી રહ્યો છે. નવા નિયમો મુજબ, કેનેડા-યુએસ સરહદ ઝડપથી પાર કરવા માંગતા અરજદારોએ હવે તેમની બોર્ડર એનરોલમેન્ટ ઇન્ટરવ્યુની પ્રક્રિયા પૂર્ણ કરવા માટે ટૂંકા સમયગાળાનો સામનો કરવો પડશે. એજન્સી દ્વારા સ્પષ્ટ કરવામાં આવ્યું છે કે ૧ એપ્રિલ, ૨૦૨૭ ના રોજ કે ત્યારબાદ કન્ડીશનલ એપ્રૂવલ (શરતી મંજૂરી) મેળવનાર તમામ અરજદારોએ મંજૂરીની તારીખથી બે વર્ષની અંદર જ પોતાનો ઇન્ટરવ્યુ શિડ્યુલ કરવો પડશે. કેનેડા અને યુએસ બોર્ડર એજન્સીઓ દ્વારા ઇન્ટરવ્યુ લેવાની ક્ષમતામાં વધારો કરવામાં આવ્યો હોવાથી આ પ્રોગ્રામને ફરીથી તેના મૂળ સમયગાળા પર લાવવામાં આવી રહ્યો છે.
ગુજરાતી ઇન્ડો-કેનેડિયન સમુદાય, વ્યવસાયિક હેતુથી અવારનવાર અમેરિકા જતા બિઝનેસ ટ્રાવેલર્સ અને ફેમિલી વિઝિટ માટે બોર્ડર ક્રોસ કરતા પરિવારજનો માટે આ જાહેરાત એક મોટી ચેતવણી સમાન છે. આથી, જેમણે પણ નેક્સસ કાર્ડ માટે અરજી કરી છે તેમણે પોતાની પેન્ડિંગ એપ્લિકેશનનો સ્ટેટસ તાત્કાલિક તપાસી લેવું જોઈએ જેથી તેમની પાત્રતાની વિન્ડો બંધ થઈ જાય તે પહેલાં યોગ્ય એપોઇન્ટમેન્ટ બુક કરી શકાય. ૧ એપ્રિલ, ૨૦૨૭ પહેલા કન્ડીશનલ એપ્રૂવલ મેળવનારા અરજદારો માટે એક સક્રમણકાલીન એટલે કે ટ્રાન્ઝિશનલ નિયમ લાગુ પડશે. આવા અરજદારોએ તેમની શરતી મંજૂરી મળ્યાના પાંચ વર્ષની અંદર અથવા તો ૧ એપ્રિલ, ૨૦૨૯ સુધીમાં, જે પણ તારીખ પહેલાં આવે તે મુજબ પોતાનો ઇન્ટરવ્યુ બુક કરવાનો રહેશે. મહામારીના કારણે સર્જાયેલા વિલંબને ધ્યાનમાં રાખીને અગાઉ આ પાંચ વર્ષની કામચલાઉ મુદત આપવામાં આવી હતી.
આ સમયમર્યાદાની ગણતરી કેવી રીતે થાય છે તે સમજવું ઇન્ડો-કેનેડિયન પરિવારજનો માટે ખાસ જરૂરી છે. ઉદાહરણ તરીકે, જે વ્યક્તિને ૧ જાન્યુઆરી, ૨૦૨૪ ના રોજ શરતી મંજૂરી મળી હતી, તેમની ઇન્ટરવ્યુ બુક કરવાની છેલ્લી તારીખ ૧ જાન્યુઆરી, ૨૦૨૯ રહેશે. પરંતુ, જેને ૧ જાન્યુઆરી, ૨૦૨૬ ના રોજ મંજૂરી મળી હશે, તેમને પૂરા પાંચ વર્ષ નહીં મળે પરંતુ તેમણે ૧ એપ્રિલ, ૨૦૨૯ ની વહેલી કટ-ઓફ તારીખ સુધીમાં જ ઇન્ટરવ્યુ શિડ્યુલ કરવો પડશે. અહીં ખાસ યાદ રાખવું જરૂરી છે કે આ તમામ કટ-ઓફ તારીખો અરજી કર્યાની તારીખથી નહીં પરંતુ કન્ડીશનલ એપ્રૂવલ મળ્યાની તારીખથી ગણવામાં આવે છે. તેથી અરજદારોએ મુળ એપ્લિકેશન તારીખને બદલે પોતાની અપ્રુવલ ડેટ ચોક્કસપણે ચકાસી લેવી જોઈએ.
નેક્સસ મેમ્બરશિપ મેળવવા માટે કન્ડીશનલ એપ્રૂવલ એ માત્ર પ્રથમ તબક્કો છે. અંતિમ મેમ્બરશિપ મેળવતા પહેલા અરજદારે સીબીએસએ (CBSA) અને યુ.એસ. કસ્ટમ્સ એન્ડ બોર્ડર પ્રોટેક્શન (CBP) બંને એજન્સીઓ સાથે ઇન્ટરવ્યુ પ્રક્રિયા પૂર્ણ કરવી પડે છે. આ ઇન્ટરવ્યુમાં ઓળખની ચકાસણી, ફિંગરપ્રિન્ટ્સ (આંગળીના નિશાન) અને બોર્ડર અધિકારીઓ દ્વારા પૂછવામાં આવતા પ્રશ્નોનો સમાવેશ થાય છે. કેનેડિયન ભાગનો ઇન્ટરવ્યુ કેનેડામાં આવેલા નેક્સસ એનરોલમેન્ટ સેન્ટર પર થાય છે, જ્યારે અમેરિકન ભાગનો ઇન્ટરવ્યુ સીબીપી એનરોલમેન્ટ સેન્ટર પર અથવા એરપોર્ટ પર ‘એનરોલમેન્ટ ઓન અરાઇવલ’ સુવિધા દ્વારા પૂર્ણ કરી શકાય છે. મુસાફરીનું આયોજન કરતા પહેલા અરજદારોએ પોતાની પસંદગીના ઇન્ટરવ્યુ વિકલ્પ માટેની સત્તાવાર માર્ગદર્શિકા વાંચી લેવી હિતાવહ છે.
નેક્સસ પ્રોગ્રામ બંને દેશોની સરહદી એજન્સીઓ દ્વારા સંયુક્ત રીતે ચલાવવામાં આવે છે. જમીન, હવાઈ અથવા બોટ માર્ગે કેનેડા કે અમેરિકામાં પ્રવેશતા પૂર્વ-મંજૂર અને લો-રિસ્ક (ઓછા જોખમ ધરાવતા) મુસાફરો માટે આ અત્યંત ઉપયોગી પ્રોગ્રામ છે. નેક્સસ કાર્ડધારકો નિર્ધારિત લેન, ઝડપી સિક્યુરિટી ચેકિંગ અને ગ્લોબલ એન્ટ્રી તથા TSA PreCheck જેવી વિશેષ સુવિધાઓનો લાભ મેળવી શકે છે. આ મેમ્બરશિપ પાંચ વર્ષ માટે માન્ય રહે છે અને તેની પ્રોસેસિંગ ફી ૧૨૦ યુએસ ડોલર (US$120) છે જે નોન-રીફંડેબલ છે. ૧૮ વર્ષથી નાની વયના બાળકો માટે ફીમાંથી મુક્તિ આપવામાં આવી છે, પરંતુ પરિવારના દરેક સભ્ય માટે અલગ મેમ્બરશિપ હોવી ફરજિયાત છે.
પરિવાર સાથે ઇન્ટરવ્યુનું આયોજન કરતી વખતે એ યાદ રાખવું જરૂરી છે કે બાળક સહિત દરેક સભ્ય માટે અલગ એપોઇન્ટમેન્ટ લેવી પડે છે. સગીર વયના બાળકો સાથે માતા-પિતા અથવા કાનૂની વાલીનું હોવું જરૂરી છે. કેનેડિયન અને અમેરિકન નાગરિકો ઉપરાંત પીઆર (Permanent Residents) પણ આ માટે અરજી કરી શકે છે. સામાન્ય રીતે પીઆર હોલ્ડર્સે કેનેડા કે યુ.એસ.માં ઓછામાં ઓછા ત્રણ વર્ષથી કાયદેસરનો વસવાટ કરેલો હોવો જોઈએ. નવા આવેલા ઇમિગ્રન્ટ્સ માટે માત્ર પીઆર સ્ટેટસ હોવું પૂરતું નથી, પરંતુ રેસિડન્સી શરતો પૂરી કરવી આવશ્યક છે. અરજીઓ યુ.એસ. ટ્રસ્ટેડ ટ્રાવેલર પ્રોગ્રામ્સ પોર્ટલ દ્વારા ઓનલાઇન કરવાની હોય છે. કબસ સ્પષ્ટપણે સલાહ આપી છે કે કોઈ ત્રીજી પક્ષકાર એજન્સી કે પેઇડ એજન્ટની મદદ લેવાની જરૂર નથી, કારણ કે તેનાથી પ્રોસેસિંગ ઝડપી થતું નથી. મુસાફરોએ પોતે જ સત્તાવાર ચેનલો દ્વારા સમયસર સ્લોટ બુક કરાવવો જોઈએ જેથી તેમની અરજી રદ ન થાય.
