નવી પેઢી, નવો સંકલ્પ : બે પેઢીઓને જોડતો સુવર્ણ સેતુ, જય હિંદ સોસાયટી, બ્રૅમ્પ્ટનની નવી યુથ કમિટી

Dhwani News Online

બ્રૅમ્પ્ટનમાં ભારતીય સમુદાયના વિકાસ અને યુવા સશક્તિકરણ માટે એક નવો અને સુવર્ણ અધ્યાય શરૂ થયો છે. જય હિંદ કેનેડિયન સોસાયટી ઈન્ક. દ્વારા બ્રૅમ્પ્ટન ખાતે ૧૮ સભ્યોની નવનિયુક્ત ‘યુથ એક્ઝિક્યુટિવ કમિટી’ની ભવ્ય રચના કરવામાં આવી છે. આ નવી કમિટીનો મુખ્ય ઉદ્દેશ્ય ભારતીય સંસ્કૃતિનું જતન કરવું, યુવાનોમાં લીડરશિપ સ્કિલ્સ અને સ્વયંસેવાની ભાવના કેળવવી તેમજ કેનેડિયન સમાજમાં વરિષ્ઠ નાગરિકો (સીનિયર્સ) અને નવી પેઢી વચ્ચે એક મજબૂત અને જીવંત સેતુનું નિર્માણ કરવાનો છે. સોસાયટીના પ્રમુખ ચંદ્રેશભાઈ પટેલના સમર્થ નેતૃત્વ હેઠળ અને સમુદાયના વડીલોના આશીર્વાદ અને માર્ગદર્શન સાથે આ મહત્ત્વકાંક્ષી પહેલ હાથ ધરવામાં આવી છે. આ માત્ર એક નવી કારોબારી સમિતિ બનાવવાનો સામાન્ય પ્રયાસ નથી, પરંતુ કેનેડામાં વસતા યુવા ઈન્ડો-કેનેડિયન્સને સમુદાયના સામાજિક અને સાંસ્કૃતિક જીવનમાં સક્રિયપણે ભાગ લેવા, તેમની સુષુપ્ત શક્તિઓ ખીલવવા અને પોતાના ભવિષ્યનું ઘડતર કરતી વખતે પોતાની ભારતીય સંસ્કૃતિ અને મૂળિયાં સાથે દ્રઢપણે જોડાયેલા રહેવા માટે એક સશક્ત અને ઉપયોગી પ્લેટફોર્મ પૂરું પાડવાનો છે.

સંસ્થાના નવનિયુક્ત હોદ્દેદારોમાં ચંદ્રેશભાઈ પટેલ પ્રમુખ તરીકે પોતાની સેવાઓ આપશે. જનરલ સેક્રેટરી તરીકે કિંજલ પટેલ અને સેક્રેટરી તરીકે શિરાલી ચોક્સીની વર્ણી કરવામાં આવી છે. સમિતિના વાઈસ પ્રેસિડેન્ટ તરીકે નિર્ભય મકવાણા, દિવ્યાંગ ત્રિવેદી અને સમીર ઈસાની જવાબદારી સંભાળશે. જોઈન્ટ સેક્રેટરી તરીકે પાર્થ પટેલ, દર્શન શાહ અને બિરેન મહેતા સેવા આપશે. નાણાકીય વ્યવસ્થા અને ખજાનચી તરીકે શિવાની પંડ્યા, નિકુંજ દોશી અને હિરેન પટોળિયાને જવાબદારી સોંપવામાં આવી છે, જ્યારે ઈન્ટરનલ ઓડિટર તરીકે જીનલ શાહની નિમણૂક કરવામાં આવી છે. આ ઉપરાંત, બોર્ડ ઓફ ડિરેક્ટર્સમાં તૃષાલી પટેલ, વંદના બબલી, મીનલ નિગમ, શ્રીવિદ્યા અને પ્રતીક ચક્રવર્તીનો સમાવેશ થાય છે. આ ૧૮ સભ્યોની યુવા કારોબારી ટીમ એક જ પ્લેટફોર્મ પરથી ઉત્સાહ, જવાબદારી અને સેવાભાવના સાથે સમુદાયના ઉત્થાન માટે કાર્યરત થશે.

જય હિંદ સીનિયર્સ ક્લબના સભ્યો, પ્રમુખ ચંદ્રેશભાઈ પટેલ અને સમગ્ર કારોબારી ટીમે આ નવી યુવા કમિટીને હાર્દિક અભિનંદન પાઠવ્યા હતા અને આ પહેલને “અનુભવ અને ઊર્જાશક્તિનો અદ્ભુત સંગમ” ગણાવ્યો હતો. આ સંદેશ પાછળનો મુખ્ય હેતુ અત્યંત ઊંડો અને અર્થપૂર્ણ છે. સમુદાયના વડીલો પાસે દાયકાઓનો જીવનઅનુભવ, સાંસ્કૃતિક જ્ઞાન અને કેનેડામાં શરૂઆતી દિવસોમાં અનુભવેલી ચડાવ-ઉતારની સમજ છે. સામે પક્ષે, નવી યુવા પેઢી પાસે નવતર વિચારો, આધુનિક ટેકનોલોજી અને કેનેડાના મલ્ટી-કલ્ચરલ વાતાવરણમાં અભ્યાસ અને કામકાજ દ્વારા કેળવાયેલો વિશાળ દ્રષ્ટિકોણ છે. જ્યારે આ બંને પેઢીઓની શક્તિઓ ભેગી થાય છે, ત્યારે ઈન્ડો-કેનેડિયન સમુદાય માટે એક અત્યંત મૂલ્યવાન અને પ્રેરણાદાયી વાતાવરણ ઊભું થાય છે.

ઘણા ઈમિગ્રન્ટ પરિવાર માટે પેઢીઓ વચ્ચે સાંસ્કૃતિક ઓળખ જાળવી રાખવી એ એક મોટો પડકાર હોય છે. માતા-પિતા અને દાદા-દાદી ભારતીય ભાષાઓ, પરંપરાઓ, ઉત્સવો અને સામાજિક મૂલ્યો સાથે ગાઢ રીતે જોડાયેલા હોય છે, જ્યારે કેનેડામાં ઉછરેલા બાળકો એક જુદા સાંસ્કૃતિક વાતાવરણનો અનુભવ કરે છે. જય હિંદ કેનેડિયન સોસાયટી આ બે અલગ દુનિયા વચ્ચે એક મજબૂત પુલ બનીને યુવાનોને માત્ર સાંસ્કૃતિક કાર્યક્રમોના પ્રેક્ષક મટીને આયોજક અને નેતા બનાવવાની દિશામાં કામ કરશે. આ સંસ્થાના મુખ્ય ઉદ્દેશ્યોમાં યુવા નેતૃત્વનો વિકાસ, કેરિયર ગાઈડન્સ, નેટવર્કિંગની તકો, કોમ્યુનિટી સર્વિસ, વોલન્ટિયરિઝમ અને સીનિયર્સ તથા યુવાનો વચ્ચેનું અંતર ઘટાડવાનો સમાવેશ થાય છે.

કેરિયર ગાઈડન્સ અને પ્રોફેશનલ નેટવર્કિંગ આ સંગઠનનું મુખ્ય અંગ બનશે. અનુભવી પ્રોફેશનલ્સ, બિઝનેસમેન અને કોમ્યુનિટી લીડર્સ સાથે યુવાનોનું નેટવર્કિંગ કરાવીને મેન્ટરશિપ અને માર્ગદર્શન પૂરું પાડવામાં આવશે. સાથે સાથે સામાજિક સેવા અને વોલન્ટિયર કામગીરી દ્વારા યુવાનોમાં આત્મવિશ્વાસ અને જવાબદારીની લાગણી કેળવાશે. સંસ્થાનો વ્યાપક દ્રષ્ટિકોણ કેનેડામાં એક એવા સંગઠનનું નિર્માણ કરવાનો છે જે પોતાના વારસા પર ગર્વ અનુભવે અને સાથે સાથે કેનેડિયન સમાજમાં સક્રિય અને સકારાત્મક યોગદાન આપે.

ટૂંક સમયમાં બ્રૅમ્પ્ટન ખાતે આ નવી કારોબારી માટે એક ભવ્ય શપથ ગ્રહણ સમારોહ યોજવાની યોજના છે. આ ઉપરાંત, આવનારી દિવાળી અને ગરબા મહોત્સવના ભવ્ય આયોજન અંગે પણ વિચારણા ચાલી રહી છે, જેની સંભવિત તારીખો ૨૪-૨૫ ઓક્ટોબર અથવા ૩૧ ઓક્ટોબર થી ૧ નવેમ્બર, ૨૦૨૬ હોઈ શકે છે. આ કાર્યક્રમમાં કેનેડાના સ્થાનિક સાંસદો (MPs), પ્રોવિન્સિયલ સભ્યો (MPPs) અને મેયર જેવા અગ્રણી મહાનુભાવોને ખાસ આમંત્રિત કરવામાં આવશે. જય હિંદ સીનિયર્સ ક્લબના જોઈન્ટ સેક્રેટરી અને મીડિયા કોઓર્ડિનેટર ડૉ. અજય રાયઝાદા દ્વારા આ નવી કમિટી અને ભવિષ્યના આયોજનો અંગેની વિગતવાર માહિતી પૂરી પાડવામાં આવી હતી.

આ પ્રસંગે ઈન્ડો-કેનેડિયન સમુદાયના અનેક રાજકીય, સામાજિક અને વ્યાવસાયિક અગ્રણીઓએ નવી કારોબારી સમિતિને પાઠવેલી વિશેષ શુભેચ્છાઓ અને બેસ્ટ કોમ્પ્લીમેન્ટ્સ (Best Compliments) આપનાર મહાનુભાવો:

‘ધ્વનિ ઓનલાઈન ન્યૂઝ’ પરિવાર તરફથી જય હિંદ કેનેડિયન સોસાયટી ઈન્ક. અને તેની નવનિયુક્ત ‘યુથ એક્ઝિક્યુટિવ કમિટી’ના તમામ સભ્યોને ખૂબ ખૂબ અભિનંદન અને ઉજ્જવળ ભવિષ્ય માટે હાર્દિક શુભકામનાઓ!

પિક્ચર કર્ટસી : જય હિંદ કેનેડિયન સોસાયટી ઈન્ક.